Нью-Йорктегі Comex биржасында маусым айындағы алтын фьючерстерінің бағасы 55,47 долларға өсіп, 3232 долларды құрады.
Оған дейін баға жаңа рекордтық максимумға – 3240,2 долларға жеткен болатын.
Алтынға деген сұраныс геосаяси тұрақсыздық немесе жаһандық экономикалық шиеленіс кезеңдерінде қауіпсіз актив ретінде артады, бұл оның бағасының өсуіне ықпал етеді.
Әлемдік нарықтағы алтын бағасының өсуі Қазақстанға да әсер етуде. Ұлттық Банкінің мәліметтері бойынша, алтын-валюта қорының көлемі 2024 жылдың бірінші тоқсанының соңында 36,2 миллиард долларды құрап, оның ішінде алтынның үлесі 58,3% болған.
Қазақстандағы алтын өндіруші компаниялар өндірген алтынның басым бөлігін Ұлттық Банк сатып алып, резерв ретінде сақтайды. Мысалы, 2022 жылы 4,6 тонна алтын экспортталған, оның негізгі бөлігі Қырғызстан, Ресей, Өзбекстан, Ұлыбритания және Түркияға жөнелтілген.
Сонымен қатар, соңғы жылдары алтыннан жасалған зергерлік бұйымдардың бағасы да өскен. Бұл көрсеткіштер алтынның Қазақстан экономикасындағы маңызды рөлін және оның құнының өсуін көрсетеді.
